Терентий Федорович Сутаков 1964 сыллаахха Бөтүҥ нэһилиэгэр элбэх оҕолоох ыалга Сутаковтарга, үһүс оҕонон төрөөбүтэ. Аҕата Федор Иванович тырахтарыыс, ийэтэ Марфа Григорьевна Уорай балыыһатыгар сиэстирэнэн, кэлин ыанньыксытынан үлэлээбитэ. Терентий Федорович оскуола саҕаттан трактореведениеҕа үөрэнэн, сайынын окко кыраабкаһытынан үлэлээн, 1981 сыллаахха орто оскуоланы 3-с кылаастаах тырахтарыыс бырааптаах бүтэрбитэ. Ол кэннэ Алтаннааҕы СПТУ-га тырахтарыыс-суоппар идэтигэр үөрэммитэ. Аармыйаҕа сылдьан суоппарынан, чаас хамандыырынан ананан сулууспалаабыта.
1984 с. аармыйаттан кэлэн «Победа» сопхуоска тырахтарыыһынан үлэлии сылдьыбыта. Онтон Олүөхүмэҕэ техникумҥа үөрэнэ сылдьан кэргэнин Татьяна Григорьевнаны көрсөн ыал буолбуттара. Билигин 4 уол, 1 кыыс оҕолоохтор, 5 сиэннээхтэр.
Терентий Федорович 1990 сылтан хойукка диэри «Бөтүҥ» сопхуоска тутуу сыахха тырахтарыыһынан, погрузчиктаах ДТ-75 тутуу маһын таһыыга, түрүлүөпкэҕэ, звеноводунан үлэлээбитэ. Кыһынын маска, сайынын окко, өрөбүл диэни өрөөбөккө, кыһаллан туран этиллибит сорудаҕы толорор, элбэх эдэр ыччат наставнига буолар.
2006-2011 сс. кэргэнинээн дьиэ кэргэн биригээдэтин тэринэн элбэх оҕолоох ыаллар оҕолоро хамнастаах буолалларыгар үлэлэспиттэрэ. Ол курдук сайынын оҕолор хортуоппуй, хаппыыста олордон көрбүттэрэ-харайбыттара. Онтон күһүнүн оҥорон таһаарбыт бородууксуйаларын атыылыырга үөрэммиттэрэ. Терентий Федорович хаһаайыстыбатын отун-маһын бэйэтэ чааһынай МТЗ тыраахтарын үлэлэтэн булар-талар. Нэһилиэннэҕэ кытта көмөлөһөр.
Терентий Федорович үлэлээбит үлэтэ сыаналанан, 2014 с. ТХ министиэристибэтин уонна СӨ продовольственнай бэлиитикэтин Бочуотунай грамотатынан, 2016 с. СӨ тыатын хаһаайыстыбатын туйгуна бэлиэнэн наҕараадаламмыта.
Үлэни өрө туппут, тырахтарыыс идэлээх Терентий Федоровиһы өссө төгүл үбүлүөйдээх түһүлгэҕинэн, наҕараадаларгынан эҕэрдэлиибит. Эйигин кытары өрүү өрөгөйдөөх үтүө майгы, айар-тобулар хотуулаах хорсун санаа аргыстастын. Бу сандаархай сааскы дьоһун күн Эн бастыҥ иэйиигин уһугуннардын, инникигэ эрэлгин эптин, дьолу уонна этэҥҥэ буолууну бэлэхтээтин. Бар дьоҥҥун үөрдэ-көтүтэ уһуннук, дьоллоохтук олор диэн алҕыыбыт!