Ынах сүөһүнү, сылгыны иитэр, оҕуруотчуттарынан, хоһуун үлэһит дьонунан биллэр Бөтүҥ нэһилиэгэр «Идэһэ — 2021» бырааһынньыгар олохтоохтор үөрэ — көтө кытыннылар. Быйыл хааччахтааһын миэрэлэринэн тэрээһин таһырдьа ыытыллан уратылаах буолла.
Бөтүҥ нэһилиэгэр ыытыллыбыт «Идэһэ — 2021» бырааһынньыгар олохтоохтор көхтөөхтүк кытыннылар, кыстык астарын булунан үөрүүлэрэ үрдээтэ. Күүтүүлэх күнү Константин Попов салайааччылаах «Махтал» үҥкүү народнай кэлэктиибэ чороонноох үҥкүүтүнэн арыйда,
Татьяна Христофорова эҕэрдэ ырыатынан уруйдаата — айхаллаата. Нэһилиэк баһылыга Алексей Никитин тыа сирин үлэһит дьонун эҕэрдэлээтэ, олохтоох дьаһалтаҕа, оскуолаҕа, уһуйааҥҥа, баһаарынай чааска, култуура киинигэр, ОДьКХ Махтал Суруктары уонна харчынан сэртипикээттэри туттарда. Оттон «Бөтүҥ» ТХПК бэрэссэдээтэлэ Дмитрий Левин ынах сүөһүнү иитэр бааһынай хаһаайыстыбалар салайааччыларыгар Полина Ивановаҕа («Чолбон»), Терентий Сутаковка («Байылыат»), сылгы иитэр Айталина Самсоноваҕа («Таҥха»), оҕуруот аһын үүннэрэр Семен Степановка («Эрэл») уонна хаһаайыстыба үлэтигэр — хамнаһыгар куруук көмө буолар тэрилтэлэргэ махталын биллэрдэ, бэлэхтэрин туттарда. Атыы — эргиэн дьаарбаҥкатыгар «Бөтүҥ» ТХПК, бааһынай хаһаайыстыбалар, Н.Е.Иванов аатынан агрооскуола, кэтэх хаһаайыстыбалаах түөлбэ олохтоохторо онтон да атыттар кытыннылар. Олохтоохтор араас күрэстэргэ кытыннылар. Саамай улахан сыалыһары хаптарбыт Егор Борисов портативнай оһох хаһаайына буолла. Биэс хамаанда көрдөөх оонньуутугар Маркел Егоров уонна Анастасия Семенова кыайыылааҕынан таҕыстылар. Бастыҥ хамаандалар булка — алка туттуллар тэриллэринэн наҕараадаланнылар. Сүүйүүлээх лотерея элбэх киһи болҕомтотун тарта. Манна олохтоох дьаһалта
куулунан собото, «Бөтүҥ» хаһаайыстыба 15 куул эбиэс бурдуга, сүөһүтүн этэ, ис үөрэтэ, оскуола бэлимиэнэ, тиэптэлэ, түөлбэ олохтоохторун үрүҥ астара, араас бородууксуйалара, Амма мүөтэ, Олег Егоров күһүҥҥү кустара онтон да атын ас — үөл оонньонно. Сүүйүүлээх оонньуу саамай улахан бирииһэ биир дьааһык ынах арыыта Александр Артемьевка тигистэ. Оттон элбэх оҕолоох Петр Марков 12 билиэти ылбытыттан 10 билиэтэ, Елена Степанова 8 билиэтиттэн 6 — та сүүйүүлээх буолланнар ас эгэлгэтин тутаннар өссө үөрдүлэр.
«Бөтүҥмүт хороҕор муостааҕы ууһатар, сыспай сиэллээҕи тэнитэр, үрүҥ илгэни үрүлүтэ сүүрдэр, оҕуруот аһын дэлэччи үүннэрэр хоһуун үлэһит дьонунан биллэр. Улууспутугар «Идэһэ» бырааһынньыга тэриллиэҕиттэн саҕалаан нэһилиэкпитигэр уйгу — быйаҥ бырааһынньыгын сыллата ыытан кэллибит. Быйыл хааччахтааһын миэрэлэринэн тэрээһиммитин таһырдьа ыыппыппыт уратылаах буолла. Дьоммут — сэргэбит атыы — эргиэн дьаарбаҥкатыгар сылдьан, күрэхтэһэн сэргэхсийэн, лотереяҕа кыттан кыстык астарын булунан астынан тарҕастылар. Лотереябытыгар Амма нэһилиэгин олохтоохторо кыттан бэртээхэй бириистэргэ тиксэн эмиэ үөрдүлэр — көттүлэр», — диэн этэр нэһилиэк баһылыгын солбуйааччы Алексей Стручков.
Метки
Подробнее: https://xn--80aaaambpp4b1d.xn--p1ai/article/31650