Бөтүҥ нэһилиэгин историятыгар киирэр, социальнай көмүскэл эйгэтигэр, дьиэ кэргэн уонна дьахтар комитетын, дьахталлар союзтарын тэрийсэн, иилээн-саҕалаан, салайан кэлбит Светлана Ефимовна Николаева аатын үйэтитэр «Ийэ скверэ» дьоно-сэргэ кэлэн сынньанан, уоскуйан, аара баран иһэн тохтоон ааһар сирдэрэ буолар. «Ийэ скверэ» сурун уратытынан нэһилиэкпит киэн туттар дьахталларын ааттарын үйэтитэр ыскамыайкалар оҥоһуллан тураллара буолар. Бу ыскамыайкалары салайааччы дьахталларбыт, герой ийэлэрбит бииргэ үөрэммит үөлээннээхтэрэ, аймахтара төрөөбүт түөлбэлэрэ өссө сайдарын туһугар, инники көлүөнэлэригэр анаан бэйэлэрин баҕаларынан умнуллубат бэлэх оҥорбуттара.
Бүгүн бэс ыйын 1 күнүгэр Герой Ийэ, Үлэ уонна Тыыл бэтэрээнэ — Мария Нестеровна Алексеева аатын үйэтитэр кэрэ оҥоһулаах ыскамыайка туттарыллар үөрүүлээх түгэнэ буолла. Сымнаҕас майгылаах, киэҥ холку көҕүстээх, аламаҕай, ыалдьытымсах, аймаҕымсах Алексеевтар дьиэ кэргэн күн күбэй ийэлэрэ Мария Нестеровна ыраас дууһалаах, ханнык да киһиттэн кэрэ, истиҥ, чугас, сырдык киһи этэ.Бу бэлиэ тугэҥҥэ Бөтүҥ нэһилиэгэ муниципальнай тэриллии баһылыга Алексей Николаевич Никитин, Бөтүҥ нэһилиэгин дьахталларын сэбиэтин бэрэссэдээтэлэ Татьяна Григорьевна Сутакова, Бөтүҥ нэһилиэгин бочуотаах олохтооҕо Ванифадий Иванович Васильев, Дальнай Восток бочуоттаах энергетига, Амма нэһилиэгин бочуоттаах олохтооҕо Анатолий Денисович Алексеев, СР үөрэҕириитин туйгуна Анна Денисовна Иванова, РФ уопсай үөрэҕириитин бочуоттаах үлэһитэ Оксана Николаевна Семенова, Денис Денисович Алексеев чугас киһилэрин, ийэлэрин, эбэлэрин Мария Нестеровна Алексеева туһунан ахтан-санаан, эҕэрдэ тыл этэн Бөтүҥнээҕи «Ийэ скверигэр» бастыҥ өйдөбүнньүк, кэрэхсэбиллээх киэргэл буолар ыскамыайканы туттардылар.
